Grid View
List View
  • wrtingfreak 106w

    ਅਣਜਾਣ ਪਹੇਲੀਆਂ ਹਾਸਿਆਂ ਪਿੱਛੇ ,
    ਮੇਰੇ ਤੋਂ ਵੀ ਬੁਝਦੀਆਂ ਨਹੀਂ ।

    ਜੜਾਂ ਤਾਂ ਤੇਰੀਆਂ ਬਹੁਤ ਡੂੰਘੀਆਂ ,
    ਟਾਹਣੀਆਂ ਪੱਤੀਆਂ ਉੱਘਦੀਆਂ ਨਹੀਂ ।

    ਮੈਂ ਤਾਂ ਰੁੱਝਿਆ ਫਿਕਰਾਂ ਦੇ ਵਿੱਚ ,
    ਪਰ ਫਿਕਰਾਂ ਕਿਉਂ ਰੁਝਦੀਆਂ ਨਹੀਂ ।

    ਮੈਂ ਦਰਦ ਲੁਕੋ ਕੇ ਰੱਖਦਾ ਸੀਨੇ ,
    ਫਿਰ ਵੀ ਪੀੜਾਂ ਮੁੱਕਦੀਆਂ ਨਹੀਂ ।

    ਆਸ ਜੇ ਹੈ ਤਾਂ ਹੌਂਸਲੇ ਲੱਖਾਂ ,
    ਕੁੱਝ ਧਾਰਿਆਂ ਹਿੰਮਤਾਂ ਟੁੱਟਦੀਆਂ ਨਹੀਂ ।

    ~ ਸਨਮ
    ©wrtingfreak

  • wrtingfreak 117w

    ਇਹਨਾਂ ਚੰਦਰੇ ਹਲਾਤਾਂ ਮੈਨੂੰ ਅੱਖਰਾਂ ਤੋਂ ਦੂਰ ਕੀਤਾ ,
    ਮੈਂ ਤਾਂ ਮੇਰੀ ਨਿਗਾਹ ਵਿੱਚ ਖੁਦ ਨੂੰ ਹੀ ਚੂਰ ਕੀਤਾ ।

    ਕੁਝ ਪਲ ਵੀ ਨੀ ਬੈਠ ਹੁੰਦਾ ਆਵਦੇ ਹੀ ਕੋਲ ,
    ਉਂਝ ਲੋਕਾਂ ਅੱਗੇ ਖੁਦ ਨੂੰ ਸੀ ਬੜਾ ਮਸ਼ਹੂਰ ਕੀਤਾ ।

    ਮੈਨੂੰ ਦੇਖ ਮੇਰਾ ਚੰਨ ਪਿੱਛੇ ਬੱਦਲਾਂ ਦੇ ਲੁਕੇ ,
    ਜਿਸ ਦੀ ਮੁਹੱਬਤ ਸੀ ਸਨਮ ਹਜ਼ੂਰ ਕੀਤਾ ।

    ਇੱਕ ਚਾਹਤ ਹੈ ਮੇਰੀ ਕਰਾਂ ਇੰਦਰ ਤੇ ਰਾਜ ,
    ਵਗੂ ਪਿਆਰ ਦੀ ਹਵਾ ਕਹੂ ਦੁਨੀਆਂ ਕੀ ਨੂਰ ਕੀਤਾ ।

    ~ ਸਨਮ
    ©wrtingfreak

  • wrtingfreak 125w

    ਬੇ - ਅਸਰ ਹੁੰਦਾ ਜਾ ਰਿਹਾ ਮਾੜਾ ਸਮਾਂ ਵੀ ,
    ਮੇਰੀ ਮੁਸਕਾਨ ਇਸ ਤੋਂ ਗਮੀ ਚ ਤਬਦੀਲ ਨੀ ਹੋ ਰਹੀ...

    ਬੜਾ ਜ਼ੋਰ ਲਾ ਰਹੀ ਹੈ ਕਿਸਮਤ ਵੀ ਮੇਰੇ ਰਾਹਾਂ ਵਿਚ ਕੱਚ ਖਿੱਲਾਰਕੇ ,
    ਪਰ ਫਿਰ ਵੀ ਉਸਤੋਂ ਮੇਰੇ ਜਜ਼ਬੇ ਦੀ ਹਿੰਮਤ ਜ਼ਲੀਲ ਨੀ ਹੋ ਰਹੀ...

    ਕਿਸੇ ਦੀ ਪਰਵਾਹ ਦਾ ਨਾਮੋ - ਨਿਸ਼ਾਨ ਮਿਟਦਾ ਜਾ ਰਿਹਾ ਜ਼ਹਿਨ ਚੋਂ ,
    ਲਗਦਾ ਇਸ ਦਿਲ ਨੂੰ ਹੁਣ ਬੇ - ਵਫਾਈ ਤੋਂ ਵੀ ਤਕਲੀਫ ਨੀ ਹੋ ਰਹੀ...

    ਸਾਡਾ ਕਿਰਦਾਰ ਵੀ ਖੁਦ - ਬ - ਖੁਦ ਬੇ - ਦਾਗ਼ ਹੋ ਚੁੱਕਿਆ ,
    ਅਫਸੋਸ ਅਫਵਾਵਾਂ ਫ਼ੈਲਾਉਣ ਵਾਲਿਆਂ ਤੋਂ ਸਾਡੇ ਖਿਲਾਫ ਦਲੀਲ ਨੀ ਹੋ ਰਹੀ...

    ਅੱਖਾਂ ਵਿੱਚ ਡੋਬ ਲੈਣ ਦਾ ਮਾਣ ਕਰਦੇ ਨੇ ਜੋ ,
    ਓਹਨਾ ਤੋਂ ਅੱਖ ਸਨਮ ਲਈ ਝੀਲ ਨੀ ਹੋ ਰਹੀ ।

    ~ ਸਨਮ
    ©wrtingfreak

  • wrtingfreak 129w

    ਇਸ ਜ਼ਹਿਨ 'ਚੋਂ ਅੱਖਰ ਲੱਭਦੇ ਨੂੰ ਹੁਣ ਮਿਲਦਾ ਕੱਖ ਨਹੀਂ ।
    ਇਕ ਬਹੁਤ ਐ ਮੈਨੂੰ ਸਮਝਣ ਲਈ ਲੋੜੀਂਦਾ ਲੱਖ ਨਹੀਂ ।

    ਨਾ ਦੂਰ ਜਾਣ ਦੀ ਕੋਸ਼ਿਸ਼ ਕਰ ਹੋਇਆ ਜਾਣਾ ਵੱਖ ਨਹੀਂ ।
    ਸਾਗਰ ਭਾਵੇਂ ਬਲਵਾਨ ਬੜਾ , ਮੁੜ ਸਕਦਾ ਝਰਨਿਆਂ ਤੱਕ ਨਹੀਂ ।

    ਸੂਲਾਂ , ਪੱਥਰ ਪੈਰੀਂ ਚੁੱਭਣੇ ਸਨਮ ਤੂੰ ਜਾਣਾ ਥੱਕ ਨਹੀਂ ।
    ਲੱਖ ਗਾਵੀਂ ਗੁਣ ਹੋਰਾਂ ਦੇ ਪਰ ਮਾਂ - ਪਿਓ ਵਰਗਾ ਰੱਬ ਨਹੀਂ ।

    ਹਰ ਇਕ ਦੇ ਨਾਲ ਸਾਂਝ ਰੱਖੀਂ ਪਰ ਡੁੱਬਣਾ ਨੱਕੋ - ਨੱਕ ਨਹੀਂ ।
    ਜਜ਼ਬਾਤਾਂ ਦੀ ਕਦਰ ਪੈਂਦੀ ਨਾ , ਇਸ ਵਿਚ ਰਤਾ ਵੀ ਸ਼ੱਕ ਨਹੀਂ ।

    ਬਦਲਿਆ ਤੈਨੂੰ ਲੋਕ ਦੱਸਣਗੇ , ਆਵਾਜ਼ ਖਿਲਾਫ ਤੂੰ ਚੱਕ ਸਹੀ ।
    ਤੈਨੂੰ ਚਾਹੁਣਗੇ ਜਦ ਤੱਕ ਮਤਲਬ ਐ , ਕਦੇ ਆਉਂਦੇ ਕੰਮ ਕੱਖ ਨਹੀਂ ।

    ~ ਸਨਮ
    ©wrtingfreak

  • wrtingfreak 138w

    ਹਮੇਸ਼ਾ ਮੇਰਾ ਹੌਂਸਲਾ ਬਣਦੀਆਂ ਨੇ ਤੇਰੀਆਂ ਦੁਆਵਾਂ ,
    ਫ਼ਕੀਰਾਂ ਵਾਂਗ ਮਸਤੀ ਚ ਰਖਦੀਆਂ ਨੇ ਤੇਰੀਆਂ ਅਦਾਵਾਂ ।

    ਸਰਾਹਵਾਂ ਤੇਰੇ ਨੈਣਾਂ ਨੂੰ ਇਸ ਕਾਬਿਲ ਨੀ ਮੈਂ ,
    ਖਵਾਬਾਂ ਦੇ ਦੇਸ਼ ਦਾ ਰਾਜਾ ਬਣਾਉਂਦੀਆਂ ਨੇ ਤੇਰੀਆਂ ਨਿਗਾਹਵਾਂ ।

    ਮੰਨਿਆਂ ਕਿ ਆਸ਼ਿਕ ਹਾਂ ਤੇਰਾ ਪਰ ਰੀਸ ਤੇਰੀ ਨਹੀਂ ਕਰ ਸਕਦਾ ,
    ਤੂੰ ਆਪਣੀ ਰਜ਼ਾ ਚ ਰੱਖੀਂ , ਮੰਜ਼ੂਰ ਤਸੀਹੇ ਵੀ ਤੇ ਤੇਰੀਆਂ ਸਜਾਵਾਂ ।

    ਬੇ - ਖੌਫ਼ ਹਾਂ ਮੈਂ ਆਵਦਾ ਹਰ ਐਬ ਜਾਣਦੇ ਹੋਏ ਵੀ ,
    ਭਰੋਸਾ ਹੈ ਕਿ ਤੂੰ ਮੁਆਫ਼ੀ ਦੇ ਦੇਣੀ ਮੇਰਿਆਂ ਗੁਨਾਹਾਂ ।

    ਇਸ ਹਵਾ ਤੋਂ ਹੱਕ ਖੋਹ ਲਵੀਂ ਰੱਬਾ ਮੇਰੇ ਜਿਸਮ ਨੂੰ ਜਾਨ ਦੇਣ ਦਾ ,
    ਬਸ ਦੋ ਹੀ ਵੇਲ਼ੇ ਹੰਝੂ ਅੱਖੋਂ ਆਵੇ , ਜਾਂ ਤਾਂ ਉਹਤੋਂ ਰੁੱਸਾਂ ਜਾਂ ਮਨਾਵਾਂ ।

    ਤੈਨੂੰ ਹੋਵੇ ਪਤਾ ਮੇਰਾ ਹਰ ਰਾਜ਼ , ਹਮੇਸ਼ਾ ਲਵਾਂ ਤੇਰੀਆਂ ਸਲਾਹਵਾਂ ,
    ਹਮੇਸ਼ਾ ਹੌਂਸਲੇ ਨੂੰ ਦੂਣਾ ਕਰੀ ਰੱਖਣ , ਜੋ ਮੇਰੇ ਲਈ ਨੇ ਤੇਰੀਆਂ ਦੁਆਵਾਂ ।

    ~ ਸਨਮ
    ©wrtingfreak

  • wrtingfreak 140w

    ਤੇਰੇ ਨੈਣਾਂ ਨੇ ਦਿੱਤੀਆਂ ਨੇ ਬਹੁਤ ਮੈਨੂੰ ਗਜ਼ਲਾਂ ,
    ਜਿਵੇਂ ਕਿਰਸਾਨਾਂ ਨੂੰ ਖੁਸ਼ੀ ਦੇਣ ਫਸਲਾਂ ।
    ਬਿਆਨ ਕਿਵੇਂ ਕਰਾਂ ਇਸ ਇਸ਼ਕ ਦੇ ਰੰਗ ਨੂੰ ,
    ਜੀਹਦਾ ਨਾ ਕੋਈ ਧਰਮ ਤੇ ਨਾ ਹੀ ਕੋਈ ਨਸਲਾਂ ।

    ਮੇਰੇ ਸਾਹਾਂ ਨੂੰ ਵੀ ਇਸਨੇ ਔਕਾਤ ਦੱਸਤੀ ,
    ਰਹਿਣਾ ਕੱਖ ਨੀ ਜੇ ਓਹਨਾ ਦੀ ਲਿਹਾਜ ਛੱਡਤੀ ।
    ਚੱਲ ਹੁਕਮ ਚ ਮੇਰੇ , ਮਿਲੂ ਹਿੰਮਤ - ਏ - ਮੋਹੱਬਤ ,
    ਉਸ ਰੰਗ ਨੇ ਸੌਗਾਤ ਵਿੱਚ ਬਾਤ ਰਖਤੀ ।

    ਮੈਂ ਵੀ ਹੱਸਕੇ ਜਿਹ ਕਹਿਤਾ ਕਿ ਫ਼ਕੀਰੀ ਮਨਜੂਰ ,
    ਮੇਰਾ ਯਾਰ ਉੱਚਾ ਰਹੇ , ਮੈਂ ਨੀ ਹੋਣਾ ਮਸ਼ਹੂਰ ।
    ਬੱਸ ਦੁੱਖ ਸਹਿਣਾ ਸਿੱਖ ਜਾਵਾਂ ਇਹੀ ਏ ਤਮੰਨਾ ,
    ਹਰ ਸਜ਼ਾ ਮਿਲੇ ਮੈਨੂੰ ਰਹੇ ਯਾਰ ਬੇ - ਕਸੂਰ ।

    ਕਹਿੰਦਾ ੲਿਸ਼ਕ ਕਿ ਬੋਲੂੰ ਤੇਰੇ ਸਿਰ ਚੜ੍ਹਕੇ ,
    ਹਰ ਨਾਜ਼ ਓਹਦਾ ਚੱਕੀਂ ਚਾਹੇ ਮਾਰੇ ਦਬਕੇ ।
    ਲੋਕਾਂ ਦੀ ਸੁਣੀ ਨਾਂ ਭਾਵੇਂ ਹੱਸਣ ਤੇਰੇ ਤੇ ,
    ਰਹੀਂ ਸੱਜਣ ਮਨਾਉਂਦਾ ਤੂੰ ਨਚਾਰ ਬਣਕੇ ।

    ~ ਸਨਮ
    ©wrtingfreak

  • wrtingfreak 140w

    ਤੇਰੀ ਇੱਕ ਝਲਕ ਨੂੰ ਤਰਸਦੇ ਹਾਂ ਅਸੀਂ ,
    ਕਿੰਨੇ ਖੁਸ਼ਮਿਜਾਜ਼ ਹੋਣਗੇ ਉਹ ਜੋ ਥੋਨੂੰ ਰੋਜ਼ ਦੇਖਦੇ ਨੇ ।

    ©wrtingfreak

  • wrtingfreak 141w

    ਨਾਲ ਤੇਰੇ...

    ਤੇਰੀ ਅੱਖਾਂ ਦੀ ਮੈਂ ਰੌਸ਼ਨੀ ਬਣ ,
    ਇਹ ਦੁਨੀਆਂ ਦੇਖਾਂ ਨਾਲ ਤੇਰੇ ।

    ਤੇਰੇ ਸੀਨੇ ਅੰਦਰ ਦਿਲ ਬਣਕੇ ,
    ਸਾਰੀ ਜ਼ਿੰਦਗੀ ਧੜਕਾਂ ਨਾਲ ਤੇਰੇ ।

    ਤੇਰੀ ਚਾਹਤਾਂ ਚੋਂ ਮੈਂ ਇੱਕ ਹੋਜਾਂ ,
    ਰਹਾਂ ਪੂਰੀਆਂ ਕਰਦਾ ਨਾਲ ਤੇਰੇ ।

    ਤੇਰੇ ਸਾਹਾਂ ਦੇ ਨਾਲ ਸਾਂਝ ਪਾਕੇ ,
    ਮੈਂ ਜਿਓਵਾਂ ; ਮਰਜਾਂ ਨਾਲ ਤੇਰੇ ।

    ~ ਸਨਮ
    ©wrtingfreak

  • wrtingfreak 141w

    ਅਜੇ ਵਖਤ ਰਹਿੰਦਾ ਏ

    ਨਾਜਾਇਜ਼ ਰਿਸ਼ਤਿਆਂ ਦਾ ਭਾਰ ਗ਼ਲੋਂ ਲਾਹਦੇ , ਅਜੇ ਵਖਤ ਰਹਿੰਦਾ ਏ ,
    ਖੁਦ ਨੂੰ ਦੁਨਿਆਵੀ ਰੁਝੇਵਿਆਂ ਤੋਂ ਬਚਾਦੇ , ਅਜੇ ਵਖਤ ਰਹਿੰਦਾ ਏ ।

    ਭੁਲੇਖਾ ਹੈ ਤੇਰੀ ਸ਼ੋਹਰਤ ਨੂੰ ਕਿ ਬੜੇ ਨਾਲ ਖੜ੍ਹਦੇ ਨੇ ,
    ਸਾਰੇ ਵਹਿਮ ਜ਼ਹਿਨ ਚੋਂ ਮਿਟਾਦੇ , ਅਜੇ ਵਖਤ ਰਹਿੰਦਾ ਏ ।

    ਬੇ - ਪਰਤੀਤ ਨੇ ਸਾਹ ਤੇਰੇ ਖੌਰੇ ਕਦੋਂ ਅਖੀਰ ਹੋਜੇ ,
    ਖੁਦ ਹੱਸ ਤੇ ਰੋਂਦਿਆਂ ਨੂੰ ਹਸਾਦੇ , ਅਜੇ ਵਖਤ ਰਹਿੰਦਾ ਏ ।

    ਬੜੇ ਮਾਸੂਮ ਨੇ ਜਜ਼ਬਾਤ ਤੇਰੇ , ਜੱਲਾਦ ਨਾ ਬਣਨ ਦਿਆ ਕਰ ,
    ਬੋਲ ਕੌੜਿਆਂ ਨੂੰ ਮਿਸ਼ਰੀ ਬਣਾਦੇ , ਅਜੇ ਵਖਤ ਰਹਿੰਦਾ ਏ ।

    ਕੱਢਿਆ ਕਰ ਕੁਝ ਸਮਾਂ ਸਨਮ ਖੁਦ ਨਾਲ ਮਹਿਫ਼ਿਲ ਸਜਾਉਣ ਲਈ ,
    ਮਨ ਨੂੰ ਕੁਦਰਤ ਨਾਲ ਮਿਲਾਦੇ , ਅਜੇ ਵਖਤ ਰਹਿੰਦਾ ਏ ।

    ਕੁਬੂਲ ਕਰ ਬੰਦਿਆ ਕਿ ਤੇਰਾ ਧਰਮ ਇਨਸਾਨੀਅਤ ਦਾ ਹੈ ,
    ਜਾਤ - ਪਾਤ ਦਾ ਕਤਲ ਕਰ ਤੇ ਕੱਫ਼ਨ ਪਾਦੇ , ਅਜੇ ਵਖਤ ਰਹਿੰਦਾ ਏ ।

    ~ ਸਨਮ
    ©wrtingfreak

  • wrtingfreak 142w

    ਮਿਹਨਤ ਦੇ ਨਾਲ ਉਘਦੇ ਫੁੱਲ ਬਗੀਚਿਆਂ ਵਿੱਚ ,
    ਬੰਜਰ ਧਰਤ ਤੇ ਯਾਰਾ ਘਾ ਵੀ ਉੱਘਦਾ ਨਾ ।
    ਜੋ ਲਿਖਿਆ ਕਿਸਮਤ ਵਿਚ ਤੇਰੀ , ਤੇਰਾ ਈ ਰਹੂ ,
    ਚੋਗਾ ਪਾਉਣ ਵਾਲ਼ਾ ਕਦੇ ਦਾਣੇ ਚੁਗਦਾ ਨਾ ।
    ਅੱਖਾਂ ਢਕ ਦਈਂ ਭਾਵੇਂ ਸਭ ਸੰਸਾਰ ਦੀਆਂ ,
    ਖੁਦ ਦੇ ਕੋਲੋਂ ਐਬ ਕਦੇ ਵੀ ਲੁਕਦਾ ਨਾ ।
    ਬੜੇ ਪੈਂਚਰ ਨੇ ਹੁੰਦੇ ਪਹੀਏ ਜ਼ਿੰਦਗੀ ਦੇ ,
    ਪਰ ਵੱਜੂ ਪੈਡਲ ਜਦ ਤੱਕ ਢਾਂਚਾ ਟੁੱਟਦਾ ਨਾ ।
    ਓਹ ਰਿਸ਼ਤੇ ਦਾ ਭਾਰ ਤਾਂ ਹੌਲਾ ਕੀਤਾ ਚੰਗਾ ਏ ,
    ਜਿੱਥੇ ਥੋਨੂੰ ਕੋਈ ਆਉਂਦੇ ਜਾਂਦੇ ਪੁੱਛਦਾ ਨਾ ।
    ਨਿਵਿਆਂ ਦੇ ਵਾਲ ਦੇਖਕੇ ਅੱਗੇ ਵਧਿਆ ਕਰ ,
    ਪਉੜੀ ਚੜ੍ਹਦਾ ਬੰਦਾ ਕਦੇ ਵੀ ਝੁਕਦਾ ਨਾ ।
    ਬਣਦਾ - ਸਰਦਾ ਹੱਕ ਜਤਾਉਣਾ ਗਲਤ ਨਹੀਂ ,
    ਮਜ਼ਦੂਰਾਂ ਤੇ ਰੋਹਬ ਮਾਰਨਾ ਢੁੱਕਦਾ ਨਾ ।
    ਭਰੋਸੇ ਵਾਲ਼ੀ ਦੌਲਤ ਹਰੇਕ ਨੂੰ ਦਿੱਤੀ ਜਾਂਦੀ ਨਾ ,
    ਪਰ ਸਨਮ ਦਾ ਮੰਨਣਾ ਇਹ ਵੀ ਵੰਡਿਆ ਮੁੱਕਦਾ ਨਾ ।

    ~ ਸਨਮ
    ©wrtingfreak